San mig vs Meralco

KAPWA pasok na sa quarterfinals ng 2013 PBA Governors Cup ang SanMig Coffee at Meralco subalit inaasahang magiging maigting pa rin ang kanilang salpukan mamayang 5:15 pm sa Smart Araneta Coliseum sa Quezon City.

Ito’y bunga ng pangyayaring ang magwawagi mamaya ay makakakuha ng twice-to-beat na bentahe sa quarterfinals.

Dikdikan din ang magiging sagupaan ng Barangay Ginebra San Miguel at Global Port sa ganap na 7:30pm dahil sa ang magwawagi ay makakausad sa susunod na yugto.

Ang Mixers at Bolts ay parehong may 5-3 records sa likod ng Petron Blaze na nagtapos nang may 8-1.

Magsusukatan ng lakas sina Marqus Blakely ng SanMig Coffee at Mario West ng Meralco.

Umiinit na rin ang two-time Most Valuable Player na si James Yap na sinusuportahan nina Peter June Simon, Mark Barroca, Marc Pingris at Joe DeVance.

Lumalim naman ang backcourt ng Meralco at nadagdagan sila ng scorer sa pagkakakuha kay Mike Cortez buhat sa Air 21.

Ang iba pang inaasahan ni coach Paul Ryan Gregorio ay sina Mark Cardona, Chris Ross, Reynell Hugnatan at Clifford Hodge.

Hangad ng Global Port (3-5) na tapusin ang elims schedule nito sa pamamagitan ng panalo upang ma- lampasan ang kabuuang bilang ng tagumpay sa unang dalawang conferences.

Sa import match-up ay magtutunggali sina Marketh Cummings ng Global Port at Dior Lowhorn ng Gin Kings.

Ang Barangay Ginebra ay may 3-4 record. Pagkatapos ng laro kontra Global Port ay makakasagupa pa ng Gin Kings ang Talk N Text sa Biyernes.

Hawak ngayon ni interim head coach Renato Agustin, ang Gin Kings ay pinamumunuan nina reigning Most Valuable Player Mark Caguioa, Jayjay Helterbrand, Chris Ellis at Billy Mamaril.

(SABRINA PASCUA)