14-anyos estudyante tepok sa suntok

BINAWIAN ng buhay ang isang 14-anyos estudyante nang mamuo ang dugo sa ulo makaraan suntukin ng kapwa estudyante sa National Christian Life College (NCLC) sa Marikina City.

Kinilala ni Senior Supt. Vincent Calanoga, hepe ng Marikina City Police, ang biktimang si John Allen Salvador, Grade 8 student, nakatira sa Sta. Barbara, San Mateo, Rizal.

Habang hawak na ng Social Welfare and Development (DSWD) ng Marikina ang suspek na itinago sa pangalang Jomar, 15, kaklase ng biktima.

Nabatid sa pulisya, dakong 5 p.m. nang mangyari ang insidente sa labas ng nabanggit na eskwelahan sa E. Mendoza St., Brgy. Sto. Nino, habang pauwi ang mga mag-aaral.

Sinasabing nayabangan ang suspek sa porma ng biktima kaya sinuntok sa ulo. Binalewala lamang ito ng biktima na dumiretso ng uwi sa kanilang bahay.

Makalipas ang ilang oras, nagkaroon ng maliit na bukol sa ulo ang biktima kasunod nang matinding sakit ng ulo kaya’t dinala ng mga magulang sa Amang Rodriguez Medical Center.

Sa puntong ito, natuklasan na nagkaroon ng hemorrhage sa ulo ang biktima bunsod nang malakas na suntok.

Makalipas ang dalawang araw ay binawian ng buhay ang biktima.