NASAKOTE ang isang lalaki sa isinagawang search warrant operation ng mga awtoridad na nakompiskahan ng baril at hinihinalang shabu sa bayan ng Bongabon, lalawigan ng Nueva Ecija, nitong Martes, 10 Pebrero.
Sa ulat mula kay P/Col. Heryl Bruno, provincial director ng Nueva Ecija NEPPO, isinagawa ang operasyon sa ilalim ng search warrant para sa kasong paglabag sa RA 10591 na inisyu ng Palayan City, Nueva Ecija Regional Trial Court (RTC) Branch 7.
Sa ikinasang operasyon, nadakip ang 40-anyos na suspek ng mga operatiba na napag-alamang ahente ng sibuyas at residente sa Brgy. Santor, sa nabanggit na bayan.
Nakompiska sa operasyon ang isang Colt M1911A1 Cal .45 pistola, ang magasin nito, anim na bala, at limang sachet ng hinihinalang shabu na may bigat na 0.25 gramo at tinatayang nagkakahalaga ng P1,700.
Napag-alamang front ng suspek ang pagiging ahente ng sibuyas upang malayang makapagbiyahe ng ilegal na droga sa Bongabon at karatig-bayan sa Nueva Ecija.
Kasalukuyang nakakulong sa Bongabon MPS custodial facility ang suspek habang inihahanda ang mga kasong paglabag sa RA 10591 at RA 9165 na isasampa laban sa kanya. (MICKA BAUTISTA)
