Klea at Mark ipaglalaban ang pag-iibigan sa #MPK

Rated R
ni Rommel Gonzales

ISANG kuwento ng pag-ibig na magpapatunay sa kasabihang ‘first love never dies’ ang tampok sa fresh episode ng Magpakailanman sa Sabado, Setyembre 25.

Bida sa episode na pinamagatang My First, My Forever sina Klea Pineda, Mark Herras, Dominic Roco, at Maey Bautista.

Maituturing na first love nina Irene at Guding ang isa’t isa subalit paghihiwalayin sila ng tadhana. Nangako sila na hindi magiging hadlang ang pagpunta ni Irene ng Maynila para mag-aral.

Pero makikilala ni Irene sa kanyang pinapasukang trabaho si Nelson na labis siyang gusto. Kaya kahit na inamin ni Irene na mayroon nang nagmamay-ari ng kanyang puso, pinagsamantalahan pa rin siya ni Nelson. Nagdalang-tao si Irene at pinilit na ipakasal ng ama ni Nelson.

Labis na nasaktan si Guding nang malaman ang balita at nagdesisyong sumali ng NPA. May pag-asa pa nga kaya ang pag-iibigan nina Irene at Guding?  

Abangan ang My First, My Forever saSabado, 7:15 p.m., sa Magpakailanman.