HATAW! D'yaryo ng Bayan hatawtabloid.com
NAUDLOT ang pagdinig ng House Committee on Constitutional Amendments para sa charter change nang magkapikonan at muntik magsuntukan sina Surigao del Norte Rep. Robert “Ace” Barbers at Surigao del Sur Rep. Prospero Pichay Jr.
Sa ginanap na pagdinig, ipinanukala ni Cebu Rep. Gwendolyn Garcia na gawing constituent assembly ang Kongreso na inayawan ng ilang mambabatas kabilang na si Pichay.
Imbes bumoto, isinuhestiyon ni Pichay na maghain muna ng resolusyon para imbitahin ang mga senador sa ginagawang deliberasyon sa Kamara bago magdesisyon kung anong pamamaraan ang gagamitin sa pag-amiyenda ng konstitusyon.
Punto ni Pichay, dapat magdesisyon ang Kongreso bilang isang kinatawan mula sa dalawang kapulungan, pero bigla siya binara ni Barbers sa pagsasabing “stupid and senseless” ang kanyang suhestiyon.
Inihinto pansamantala ng komite ang pagdinig at dito tumayo si Barbers sa kanyang upuan at nilapitan si Pichay na nasa kabilang panig ng silid.
Paglapit ni Barbers, nagmurahan ang dalawa hanggang duruin si Pichay.
Tinabig ni Pichay ang kamay ni Barbers sabay tayo at akmang susugod.
Dito pumagitna si Pangasinan Rep. Marlyn Primicias Agabas kasama ang iba pang mambabatas para awatin ang dalawa hanggang nailayo si Barbers na diretsong lumabas habang umupo si Pichay.
Kaugnay nito, agad humingi nang paumanhin si Barbers sa taongbayan.
“Sorry sa taongbayan. Wala namang physical na nangyari, kung may nasagasaan ako, humihingi ako ng tawad but my apology is not for him (Pichay). Mali ko roon ay nagsalita ako nang masama na dala rin nang pagsasalita niya,” ani Barbers.
( JETHRO SINOCRUZ )
