HATAW! D'yaryo ng Bayan hatawtabloid.com
NAGPULONG na sina Senador Erwin Tulfo, Department of Foreign Affairs (DFA) Secretary Ma. Theresa Lazaro, at Chinese Ambassador to the Philippines Jing Quan, sa layuning maayos ang gusot sa pagitan ng mga mambabatas at ilang opisyal ng Embahada ng China sa bansa ukol sa palitan ng ‘maaanghang na salita’.
Si Tulfo ay kumatawan sa mga senador dahil siya ang Chairman ng Senate Committee on Foreign Relations.
Magugunitang matapos ang palitan ng maaanghang na salita sa ilang mga senador at opisyal ng Embahada ng China ay inirekomenda ni Senate President Vicente “Tito” Sotto III ang pag-uusap ng dalawa upang matigil na ang gusot.
Matatandaang naghain ng isang resolusyon ang senado para kondenahin ang naging pahayag ng opisyal ng China ukol sa isyu ng West Philippines Sea (WPS).
Ayon kay Tulfo bukas ang channel ng senado kahit anong oras para makipag-usap sa mga kinatawan ng China kung kailangan.
Hindi idinetalye ni Tulfo kung ano pa ang napag-usapan nilang tatlo ngunit umaasang maliliwanagan na ang bawat panig. (NIÑO ACLAN)
