Baguhang rapper na si Neeyong idinaan sa rap hugot sa buhay

HARD TALK
ni Pilar Mateo

A beautiful disaster.

Ganyan masasabi ang inikutan ng bagets na bagong papaimbulog sa mundo ng rap music na si Neeyong.

Hindi naiiba ang istorya ni Neeyong sa mga  napariwarang kabataan. Nalulong. Masamang bisyo.

At hindi matatawaran ang katatagan ng loob ng ama nitong si Ambet Nabus. Nang matuklasan ang sinapit ng anak at nahulihan ito ng ebidensiya na itinago sa kanyang medyas, agad na nakapag-desisyon ang tatay na sa isang rehabilitation center na ito dalhin. Agad-agad.

Pagre-rebelde agad ang kinaharap doon ni Neeyong. Sa programang hindi niya gusto at inasahan.

At dyan umikot ang mga hugot niya sa rap na Programa.Naisulat. Naibulalas.

Ibinahagi ang naging buhay sa rehab center sa loob ng walong buwan.  Bartolina. Malayo sa outside world. Sulat lang ang nasa pagitan nilang mag-ama.

‘Di masisikmura. Straight jacket. Bartolina. Linis ng kubeta gamit ang toothbrush. Linis ng mga siit-siit ng sahig at dingding gamit ang isang toothpick lang.

Gustong maiyak ng mga tito at tita, ninong at ninang ni Neeyong na sumaksi sa kanyang album launch sa Star Pop kasama ang mga naniwala sa kanya. Rox Santos. Roxy Liquigan. Jonathan Manalo.

Hindi nakapagsisisi sa amang si Ambet ang paglalako sa noong una’y ‘di muna ipinakilalang anak.

 Personal Inventory ang titulo ng kanyang kumbaga ay album. Na maririnig din ang Yellow Corner.

Marami na ang nagsabi na malayo ang mararating ni Neeyong sa pinasok na karera.

The singer-songwriter knows what he wants. And does.

Mahusay ang pitik ng utak. Maski sa pagsagot sa mga tanong ng media.  Witty! Natural. Totoo. 

No holds barred si bagets. Sa mga kwentong ilang taon na rin namang iniingatan sa buhay niya. Pero naibahagi ng tapat at totoo.

Maganda ang kwento ni Neeyong. Kaya maganda ang habi ng bawat kanta niya.

Iba ang banat ng bagong rapper.  Sarili at iba ang estilo.

He will do the talking in his rapping!