HATAW! D'yaryo ng Bayan hatawtabloid.com
INIHAYAG kahapon ni Quezon City Police District (QCPD) Director, P/BGen. Randy Glenn Silvio na may lead na ang pulisya sa ‘gas-and-run’ driver sa isang gasoline station sa Barangay Apolonio Samson, Quezon City noong 22 Marso.
Ayon kay Silvio, sa pamamagitan ng forward at backward CCTV tracking, kinilala ang suspek na may taas na 5’2” hanggang 5’5”, nakasuot ng itim na sando, itim na pantalon, at tsinelas nang mangyari ang insidente.
Nakuha rin sa footage ang plate number ng sasakyan nang dalawang beses na huminto ang driver/suspect, na tila minamanipula ang plaka ng sasakyan at saglit na bumaba para manigarilyo.
Maya-maya ay nakitang lumiko ang sasakyan sa Crispulo St., Brgy. 178, Caloocan.
Agad na nakipag-ugnayan ang mga awtoridad sa Land Transportation Office (LTO) at Metropolitan Manila Development Authority (MMDA), na nagresulta sa mas malinaw na larawan ng plate number ng Toyota Innova at pagkakakilanlan ng rehistradong may-ari.
Sa follow-up operation, natunton ang rehistradong may-ari ng sasakyan pero sinabi nitong naipagbili na ito nang walang pormal na dokumentasyon.
Tinutugis ngayon ng QCPD ang sinabing driver ng Toyota Innova na umano’y posibleng may dala ng nasabing sasakyan. (ALMAR DANGUILAN)
