HATAW! D'yaryo ng Bayan hatawtabloid.com
TAGAYTAY CITY — Umani ng atensyon ang mga top cyclist sa Asia matapos rumatsada ang aksyon sa ACC Track at Para Track Championships sa Tagaytay Velodrome.
Hindi nagpahuli ang mga dayuhang atleta kung saan wagi si Olympian Eiya Hashimoto ng Japan sa men’s elimination race, habang dinomina naman ni Sze Wing Lee ng Hong Kong ang women’s event.
Kahit matitinding kalaban, lumaban si Pinoy rider Mark Julius Bonzo at nagtapos sa ika-11 puwesto, pinatunayan ang kanyang tibay kontra sa mas beteranong karibal.
Hindi rin nagpadaig si Angeline Elvira matapos pumuwesto sa ika-11 sa women’s division laban sa 13 kalahok.
Ayon kay Hashimoto, may potensyal ang Team Philippines basta tuloy-tuloy ang training at development.
Samantala, humakot ng medalya ang China sa iba’t ibang event, habang nagpakitang-gilas din ang South Korea at Chinese Taipei.
Sa kabila ng kakulangan sa medalya, ipinakita ng Pinoy cyclists ang puso at determinasyon laban sa world-class na kompetisyon.
Ayon kay PhilCycling chief Abraham Tolentino, nagsisimula pa lang ang bansa sa larangan ng track cycling.
“Nag-aaral pa kami at patuloy na lalakas,” ani Tolentino.
Positibo rin ang feedback ng international officials sa maayos na pagho-host ng Pilipinas—patunay na kaya ng bansa ang ganitong kalaking event. (PhilCycling/HNT)
