HATAW! D'yaryo ng Bayan hatawtabloid.com
UMABOT na sa 347 indibiduwal ang co-signatories at naghain ng Petition for Full Disclosure ng Draft Committee Report ng Senate Blue Ribbon Committee hinggil sa imbestigasyon sa mga flood control projects, alinsunod sa karapatan ng sambayanang Filipino sa impormasyon ukol sa mga bagay na may pampublikong interes sa ilalim ng Article III, Section 7 ng Saligang Batas.
Naghain si Atty. Eldrige Marvin B. Aceron, kabilang sina Constitutional Commissioner Ed Garcia at National Artist Virgilio S. Almario ng petisyon matapos ilabas ng ilang media outlet ang mga detalye ng na-leak na draft report noong gabi ng 3 Pebrero 2026.
Nabatid sa nasabing nag-leak na borador na inirekomenda ng Blue Ribbon Committee, pinamumunuan ni Senador Panfilo Lacson, na sampahan ng kasong plunder at malversation of public funds ang ilang nakaupo at dating senador at iba pang opisyal ng pamahalaan.
Kahapon, 4 Pebrero 2026, pormal na binawi nina Senador Juan Miguel Zubiri, Joseph Victor Ejercito, at Win Gatchalian ang kanilang mga lagda sa draft report — na siyang nagtulak sa kahilingan ng petisyon na obligahin ang tatlo na magsumite ng kanilang mga dahilan nang nakasulat.
Ang petisyon ay naglalaman ng anim na kahilingan, kabilang ang paglalabas ng buo at walang tinanggal (unredacted) na borador ng Blue Ribbon Committee Report.
Dapat panatilihin ang lahat ng bersiyon, kabilang ang orihinal na draft na pirmado bago ang tatlong pagbawi at obligahin sina Zubiri, Ejercito, at Gatchalian na ilahad nang nakasulat kung bakit nila binawi ang kanilang mga lagda.
Nais ng petisyon na magbigay ng isang certified true copy sa Ethics Committee para sa mga nakabinbing reklamo laban kina Escudero at Ejercito.
Bahagi ng panawagan ang pag-inhibit ni Ejercito sa lahat ng Ethics proceedings na may kinalaman kay Senador Escudero.
Makaraan ang 125 araw, nabigo pa rin ang Senate Committee on Ethics and Privileges, na pinamumunuan ni Ejercito, na magtalaga ng case number, magbigay ng anumang pagkilala (acknowledgment), at umaksiyon sa reklamo.
Noong 22 Enero 2026, naghain si Atty. Aceron ng ikalawang reklamo — laban kay Senador Ejercito mismo — dahil sa Gross Neglect of Constitutional Duty sa kabiguang iproseso ang reklamo laban kay Escudero.
Maaaring sumali ang taong-bayan sa petisyon sa pamamagitan ng pag-email sa [email protected] o pagtawag sa 0917 5919782.
