HATAW! D'yaryo ng Bayan hatawtabloid.com
SINIMULAN ng Valenzuela local government unit (LGU) ang pagtanggap ng mga iskolar para sa Dr. Pio Valenzuela Scholarship Program sa mga papasok sa unang taon sa kolehiyo para sa School Year 2026-2027.
Ayon kay Mayor Wes Gatchailan, nagsimula ang aplikasyon noong 29 Enero hanggang 20 Marso 2026, para sa scholarship grant na papasok bilang first-year college students habang itinakda ang pagsusulit sa 20 Abril 2026.
Ang scholarship program ay nagbibigay ng tulong sa mahihirap na mag-aaral sa Grade 12 na naghahanap ng suporta sa pagpapatala. Ang mga aplikanteng may trabaho ang mga magulang at mayroong annual gross income na hindi hihigit sa P120,000, na pinatunayan ng 2024 Income Tax Return (ITR), ay karapat-dapat tumanggap ng tulong.
Sa kabilang banda, kung ang mga magulang ng aplikante ay kasalukuyang walang trabaho, dapat silang magsumite ng affidavit at certificate of non-filing (ITR). Kung ang mga magulang ng aplikante ay nagtatrabaho sa ibang bansa, dapat silang magpakita ng employment contract at ang kanilang huling dalawang buwang halaga ng remittance. Dapat din silang makakuha ng certificate of residency at indigency ng parehong mga magulang mula sa kani-kanilang barangay.
Ang mga aplikante ay kailangan magsumite ng certified true copy ng Grade 11 report card, una at ikalawang semester bilang karagdagan sa Grade 12 first semester report card, parehong walang subject grades na mas mababa sa 85 at isang gross weighted average (GWA) na hindi bababa sa 85%.
Upang maging karapat-dapat sa scholarship program, ang mag-aaral ay dapat matagal nang residente sa Valenzuela, natural-born Filipino citizen, at graduate ng pampubliko o pribadong senior high school sa lungsod.
Ang mga mag-aaral na nanirahan sa lungsod nang hindi bababa sa apat na taon ay maaari rin maging karapat-dapat, na napapailalim sa pag-verify ng barangay at mga rekord ng akademiko. Ipoproseso lamang ang mga kandidato kung sila ay kalipikado at ganap na nakatugon sa mga itinakdang rekesitos. (VICK AQUINO)
