HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez
NANGINGILID na ang luha ni Angelica Panganiban bago pa man magsimula ang screening ng pelikula nila ni Zanjoe Marudo na entry ng Quantum Films at Cineko Productions sa 51st Metro Manila Film Festival, ang UnMarry, Sabado ng gabi sa Trinoma Cinema 6, Quezon City.
Hindi na kasi ito nakapagsalitang mabuti nang hingan ng pagbati nang tawagin siya nang pumasok na sa sinehan. Tiyak na ikinagulat niya ang dami ng taong nasa loob at labas ng sinehan para saksihan ang pagbabalik-pelikula niya.
Halo-halong excitement ang naramdaman ng aktres sa kanyang pagbabalik-pelikula.
Kaya naman sinalo at inakap na siya ni Eugene Domingo na kasama nila sa pelikula.
Sinuportahan si Angelica ng kanyang asawang si Gregg Homan. Dumating naman si Ria Atayde, kapatid na babae at daddy ni Zanjoe para bigyang suporta ang aktor.
Nakita rin namin sa red carpet premiere night sina Ms. Cory Vidanes, COO ng ABS-CBN, Direk Tonette Jadaone, Kean Cipriano, Maris Racal, Direk Quark Henares, Zaijian Jaranilla, Gela Atayde, Shamaine Buencamino (kasama rin sa pelikula), Pokwang, Glaiza de Castro, Enchong Dee, John ‘Sweet’ Lapus at National Artist Ricky Lee.
Maganda ang kabuuan ng pelikula na tumatalakay sa annulment. idinirehe ni Jeffrey Jeturian mula sa screenplay nina Chris Martinez at Therese Cayaba. Umiikot ang kuwento sa isang mag-asawa na hiwalay na nagpo-proseso ng dissolution ng kanilang kasal sa pamamagitan ng annulment.
Informative ang pelikula na tiyak makatutulong sa mga nagnanais mag-file annulment.
Si Celine (Angelica) ang pobreng misis ng hambog na si Stephen (Tom Rodriguez) na naghahangad makawala sa miserableng buhay kaya nag-file ng annulment.
Si Ivan naman si Zanjoe na gustong makuha ang custody ng anak na si Elio (Zac Sibug) kay Maya (Solenn Heussaff).
Si Eugene naman si Atty. Jackie na siyang nagbigay ng Annulment 101.
Pinaka-kumurot sa amin ang eksena ni Elio na nag-testify. Dito’y inihayag ni Elio ang saloobin ukol sa paghihiwalay ng magulang. Kaya naman marami ang pinaiyak ng baguhang bagets na ito.
Pagkatapos ng screening, hindi na napigilan pa ni Angelica at doon na ito napahagulgol kaya naman ganoon na lamang yakap nito sa kanyang direktor, mga kasama sa pelikula dahil overwhelming ang pagbati ng audience sa husay ng kanyang pagganap.
Hindi rin matatawaran ang husay ni Zanjoe bilang alcoholic na asawa ni Solenn na sinusubukang magbago para sa kanilang anak. Kung marami ang nahusayan kay Angelica, gayundin si Zanjoe. Kumbaga, hindi siya nagpakabog sa aktres.
Ramdam na ramdam namin ang paghihirap ng kalooban ni Zanjoe na malalayo ang anak at ang pagnanais na mabuo pa rin ang pamilya.
Sa galing ni Zanjoe, hindi malayong tanghalin siyang Best Actor ngayong 51st MMFF.
Sa kabuuan, maayos ang pagkakalatag ng UnMarry at isa ito sa inirerekomenda naming dapat mapanood ngayong Disyembre 25.
