Coco Martin idolo ng mga batang nagangarap mag-artista

SHOWBIZ KONEK
ni Maricris Valdez

IBA talaga ang galing at kasikatan ni Coco Martin. Kahit kasi mga batang nangangarap mag-artista, ang aktor/direktor ang idolo at gusto nilang makatrabaho.

Dalawa sa Fyre Squad artist ang proud na ibinahaging gusto nila si Coco. Ito ay sina Fyre Squad Atarah at Fyre Squad Cody.

Walo sa 71 kabataan ang humarap sa entertainment press para saksihan namin ang launching, gala night ng Fyre Squad Artists na isinagawa noong Sabado, October 18, 2025 sa Great Eastern Hotel.

Ayon kay Atarah hinahangaan at paborito niya si Coco dahil magaling at gusto niyang makasama sa FPJ’s Batang Quiapo. 

“Favorite ko po si Coco Martin. I’d like to work with him. I’d really admired his talent and sobrang galing niyang direktor.

“I want to be like him. He’s my inspiration din po. Gusto ko ring maging katulad niya,” anang 12 yr old na si Atarah.

“Si Coco Martin din po ang idol ko kasi magaling siya,” sabi naman ni Cody.

Bukod kay Coco may gusto rin sina Kathryn Bernardo at Joshua Garcia, Bini. Kapansin-pansin lang na sa murang edad nila wala silang paborito na kasing edad nila.

Ang FYRE SQUAD ay isang vibrant at dynamic children’s magazine-style TV show na prodyus ng  FYRE Talent Academy — isang platform na binuo para pag-alabin ang kagustuhang maipakita ang talento, pagkamalikhain, at boses.

Pinangunahan ang launching/contract signing nina Pau Ordona (Founder) at Renz Baron Florez (Co-Founder ng Fyre Talent Academy). Kasama ring inilunsad ang mga Fyre Squad Artist na sina Fyre Squad- Alisha, Fyre Squad-Dione, Fyre Squad-Ava, Fyre Squad-Brienne, Fyre Squad-Brielle, at Fyre Squad- Rob.

Si DJ Janna Chu Chu ng Barangay LSFM 97.1  ang nag-host ng event at special guest naman si Wize Estabillo ng It’s Showtime Online U.