Pinagtibay na Pundasyon para sa Palakasan sa Pilipinas: Pagsasanib-Puwersa ng MVP at Ayala Group

LUBOS ang pasasalamat ni Philippine Sports Commission (PSC) Chairman Pato Gregorio sa pagsasapormal ng kasunduan sa pagitan ng dalawa sa pinakamalalaking business conglomerates sa bansa — ang MVP Sports Foundation, Inc. (MVPSF) at Ayala Foundation, Inc. (AFI) — na naglalayong palakasin ang suporta para sa mga atletang Pilipino.
Isang matagal nang inaasam na pagtutulungan ang ngayo’y naging realidad, na may layuning palawakin ang saklaw ng tulong na naibibigay sa mga atleta sa pamamagitan ng mas malawak na plataporma na huhubog sa kanila upang magtagumpay sa pandaigdigang entablado.

“Ang partnership na ito ang eksaktong sagot sa panawagan para sa pagpapaunlad ng palakasan sa Pilipinas: pagkakaisa, pagpapabilis ng aksyon, at pagpapalawak ng ating mga layunin — lalo na sa sports infrastructure, sports tourism, at grassroots development. Nawa’y magsilbi itong daan sa pagtupad ng mga pangarap, pag-aalaga ng pag-asa, at paghubog ng mga kampeon,” ayon kay Chairman Gregorio.

Kabilang sa mga naging benepisyaryo ng mga programa ng MVPSF at AFI ay sina Carlos Yulo, double gold medalist sa Paris 2024, at Ernest John Obiena, pinakamagaling na pole vaulter sa Asya. Matagal na silang sinuportahan ng MVP at Ayala Group, kahit bago pa man sila sumikat sa pandaigdigang kompetisyon.

Sa ilalim ng kasunduan, parehong grupo ay bubuo ng komprehensibong framework na susuporta sa mga atletang Pilipino. Kabilang dito ang:
Talent Identification Programs – para matukoy ang mga world-class na atleta at sanayin sila para sa pangmatagalang tagumpay.
Pagsasama ng resources – gaya ng real estate, health assets, at iba pang yaman ng Ayala Group upang tumulong sa mga programa ng MVPSF.
Ang unang proyekto sa ilalim ng bagong partnership ay magaganap Setyembre 21, kung saan gaganapin ang isang internasyonal na pole vault competition sa Ayala Triangle Gardens, Makati City, na inisyatibo ng top Filipino pole vaulter na si EJ Obiena.
Ayon kay Panlilio, “Uupo kami upang mapag-usapan kung paano namin mapagkakaisa ang aming mga layunin. May mga programa ang MVPSF sa grassroots, talent identification, youth development, at elite level habang nakatuon naman ang Ayala Foundation sa kanilang Atletang Pinoy program. Sinusuportahan namin ang 22 sports disciplines sa kasalukuyan.”
Ang Atletang Ayala Program ay kasalukuyang sumusuporta sa 19 national athletes na may layuning makapasok sa Los Angeles 2028 Summer Olympics. Higit pa sa sports, nagbibigay rin ang programa ng mga oportunidad sa mga atleta na makapagtrabaho sa iba’t ibang industriya sa loob ng Ayala Group.
“Ang sports ay isang pambihirang paraan upang magbigay ng karangalan sa bansa. May maganda tayong pagkakataon na maging tulay sa pagitan ng kanilang mga pangarap at katotohanan. Magsama-sama tayo at ipakita kung ano ang posible,” ayon kay AFI Chairman Jaime Augusto Zobel de Ayala.
Matagal nang haligi ng sports sa bansa ang MVPSF. Nitong Hulyo lang, nag-donate sila ng P2.2 milyon halaga ng gym equipment sa PSC satellite sa Baguio City, partikular para sa mga atleta sa combat sports, upang bigyan sila ng access sa makabagong pasilidad para sa training. “Ang sports ay isang metapora ng buhay. Ang mga birtud na kailangan sa sports — sipag, disiplina, pokus, tibay ng loob — ay parehong kailangan sa totoong buhay. Masaya kami na makatrabaho ang Ayala sa paggawa ng sports na mas abot-kamay para sa mga Pilipino,” ani Manuel V. Pangilinan.
Parehong partido ang nagpahayag ng kanilang dedikasyon sa paghikayat sa iba pang mga negosyo at maging sa pamahalaan na makilahok. Ayon kay Panlilio, “Napakahalaga ng presensya ni PSC Chairman Pato upang matiyak na ito ay magiging isang public-private partnership na magtataas ng antas ng palakasan sa Pilipinas.” (PSC-PIO)


Photo caption:

SINA Jaime Augusto Zobel de Ayala, Chairman ng Ayala Foundation, Inc. (ikatlo mula sa kaliwa), at si Manuel V. Pangilinan, Chairman ng MVP Sports Foundation, Inc. (ikaapat mula sa kaliwa), ay nagsanib-puwersa sa isang makasaysayang partnership na layuning itaguyod ang mga komunidad ng Pilipino sa pamamagitan ng kahusayan sa larangan ng sports. Ito ay pormal na nilagdaan sa pamamagitan ng isang Memorandum of Understanding (MoU) noong Lunes, na ginanap sa Fairmont Hotel sa Makati City. 
Dumalo rin sa nasabing okasyon sina Emil de Quiros (Senior Director for Development Programs ng Ayala Foundation), Antonio Lambino II (President ng Ayala Foundation), Alfredo S. Panlilio (President ng MVP Sports Foundation), at John Patrick Gregorio (Chairman ng Philippine Sports Commission). (PSC Photo)