HATAW! D'yaryo ng Bayan hatawtabloid.com
PERSONAL na pinagmamasdan ni Philippine Olympic Committee (POC) president Abraham “Bambol” Tolentino ang takbo ng 2025 Track Asia Cup sa Suphan Buri, Thailand bilang bahagi ng paghahanda ng Pilipinas sa pagho-host ng Asian Cycling Confederation (ACC) Track Championships sa Marso sa bagong tayong Tagaytay CT Velodrome.
“Ito ang kauna-unahang pagkakataon sa loob ng 30 taon na magho-host ang Pilipinas ng Asian-level track championships at nais naming matiyak ang tagumpay nito,” ani Tolentino, na siya ring presidente ng national sports association para sa pagbibisikleta, ang PhilCycling.
Mainit siyang tinanggap ni Thailand Cycling Association president General Decha Hemkasri sa pagbubukas ng kumpetisyon nitong Huwebes sa Suphan Buri Velodrome, na ilang ulit nang naging venue ng parehong paligsahan.
Ang Suphan Buri Velodrome ay isang 333-meter concrete at open-air track, habang ang Tagaytay CT Velodrome ay may 250-meter wooden indoor track na sumusunod sa Olympic at world championship standards ng International Cycling Union.
Ginagamit din ni Tolentino ang ocular visit para inspeksyunin ang pasilidad na magiging venue rin ng track events para sa ika-33 Southeast Asian Games sa Disyembre.
Dalawampu’t walong (28) national at club teams ang kalahok sa Track Asia Cup—na itinakdang mula Huwebes hanggang Sabado—isang malaking bilang na ginagawa itong isa sa mga pinaka-inaabangang karera sa Asya.
“Sa 28 koponan, halos kapareho na ito ng ACC championships kung saan inaasahan nating dadalo ang mga track cyclists mula sa 40 bansa sa Asya sa Tagaytay City,” ani Tolentino.
Gaganapin ang ACC Track Championships sa Tagaytay City mula Marso 25 hanggang 31 sa susunod na taon. (POC)
