HATAW! D'yaryo ng Bayan hatawtabloid.com
LUBOS na ang pagpapaigting ng kampanya para sa pagho-host ng Pilipinas ng 2025 FIVB Volleyball Men’s World Championship matapos ang paglulunsad ng pakikipag-ugnayan sa Light Rail Transit Authority (LRTA) nitong Martes, sa pamamagitan ng makulay na biyahe ng tren mula Recto Station hanggang sa depot ng LRT-2 sa Santolan, Pasig City.
“Simula ngayong araw [Martes], makikita ng mga pasahero ng Line 2 ang mga promotional materials para sa FIVB MWCH sa loob at labas ng mga tren,” ayon kay LRTA Administrator Atty. Hernando Cabrera sa isang maikling programa na dinaluhan nina Philippine Sports Commission chairman Patrick Gregorio at Philippine National Volleyball Federation at Asian Volleyball Confederation president Ramon “Tats” Suzara.
“May isang tren talaga kaming dinisenyo para dito—may train wrap at kapag pumasok ka sa loob, makikita mo ang iba’t ibang promotional materials,” dagdag pa ni Cabrera. “Ito ay isang natatanging paraan para sa isang napaka-espesyal na okasyon.”
Nakiisa sa makasaysayang event sina FIVB MWCH Ambassadors at Alas Pilipinas Men stars Bryan Bagunas at Marck Espejo, pati na rin ang mga miyembro ng Alas Pilipinas beach volleyball team sa pangunguna ni Sisi Rondina. Eksaktong 59 na araw na lamang bago ang pagsisimula ng world championship na gaganapin mula Setyembre 12 hanggang 28 sa Smart Araneta Coliseum at SM Mall of Asia Arena.
Available na ang mga ticket para sa 32-nation world championship na solo na iho-host ng Pilipinas sa opisyal na website ng event: https://www.philippineswch2025.com.
“Nais kong pasalamatan ang pakikipagtulungan ng LRTA na malaking tulong sa malawakang promosyon ng napakalaking pandaigdigang event na ito,” ani Suzara, na kinilala rin ang presensya ng fans club ng sikat na K-Pop group na BOYNEXTDOOR, na tampok sa opening ceremony pagkatapos ng unang laban ng Alas Pilipinas kontra Tunisia sa Setyembre 12 sa SM MOA Arena.
“Lubos akong natutuwa na maging bahagi ng 2025 FIVB Volleyball Men’s World Championship,” ani Gregorio, pinuno ng government Task Force para sa event. “Bukod sa sports, may background din ako sa turismo, at naniniwala ako sa sports tourism dahil ang pinakamalalaking tourism events sa mundo ay mga sports events.”
Dagdag pa ni Gregorio: “Isa itong napakagandang halimbawa.”
Susunod sa kasabikan ng countdown para sa world championship ang opisyal na paglulunsad na pinamagatang “Set Na Natin ‘To! An Electrifying Launch” sa darating na Biyernes (Hulyo 18) — isang buong araw na event mula 10 a.m. hanggang 10 p.m., na may opisyal na programa sa ganap na 6 p.m. sa SM Mall of Asia Music Hall. (HNT)
