Para sa mga biktima ng sunog at kalamidad
Malabon LGU nagpatupad ng Documentary Relief Assistance bilang ordinansa

NAGLABAS ng bagong ordinansa ang Malabon city government na magbibigay ng libreng pagproseso at pagpapalabas ng documentary relief assistance na ilalaan para sa Malabueños na biktima ng sakuna at kalamidad.

Aprobado ni Mayor Jeannie Sandoval at ng Malabon City Council ang Ordinance No. 11-2025 na kilala bilang “Documentary Relief Assistance to Fire and Other Victims of Natural Calamities Ordinance,” na naglalayong mabawasan ang pasakit sa mga biktima na kukuha ng birth, marriage, at death certificates.

“Sa pamamagitan po ng ordinansang ito, nais po natin matulungan ang ating mga mahal na Malabueños na naapektohan ng sunog at iba pang unos. Alam po natin ang bigat na nararanasan nila, kaya naman po ito ay ating ipinatupad para makatulong at mabawasan ang kanilang alalahanin lalo na’t mahalagang magkaroon ng mga dokumento para sa kanilang pagkakakilanlan at iba pang pangangailangan. Naririto lamang po ang pamahalaang lungsod upang umagapay sa inyo,” paliwanag ni Mayor Sandoval.

Nakasaad sa ordinansa na maaaring makalibre sa dokumento sa City Civil Registry Office ang mga biktima sa loob nang isang taon matapos ang insidente.

Sinabi ni City Administrator Dr. Alexander Rosete na makatatanggap ng parusa ang mga aabuso sa libreng ordinansa kung gagamitin ito sa panloloko o pang-scam ng mga dokumento at may nakaatang na penalty na P1,000 sa una, ₱2,000 sa second offense at ₱3,000 sa third offense.

“Mayroon pong mga sakuna na hindi natin inaasahan gaya ng sunog. Pero makasisiguro po ang bawat Malabueño na tayo ay nakahandang tumulong, at magbigay ng agarang pagresponde. Makaaasa po ang mga Malabueño na tayo ay palaging nakaalalay sa kanilang mga pangangailangan,” ayon kay Rosete.

Hinihikayat ang mga residente na makipag-ugnayan sa Malabon City government para sa mga katanungan at dapat na malaman bilang Malabueño. (VICK AQUINO)