HATAW! D'yaryo ng Bayan hatawtabloid.com
PLANO niMarikina 1st District Representative Marcelino “Marcy” Teodoro na magkaroon ng high technology na kagamitan ang lahat ng pampublikong paaralan upang masigurong nakasasabay sa digital world ang kabataang Marikenyo.
Layunin ni Cong. Teodoro na gawing mas moderno, mas accessible, at mas inklusibo ang edukasyon para sa lahat na una na niyang nagagawa noong alkalde pa siya at sisiguraduhing maitutuloy ang lahat ng kanyang magagandang plano para sa edukasyon ng kabataan.
“Ang teknolohiya ay bahagi na ng pang-araw-araw na buhay. Kung hindi tayo kikilos ngayon, baka maiwanan ang mga estudyante, hindi dahil sa kakulangan ng talino kundi dahil sa kakulangan sa kagamitan,” ayon kay Teodoro.
Matatandaang noong 2 Hulyo ay inihain ni Teodoro ang House Bill No. 1255 na naglalayong magtatag ng Public Schools of the Future in Technology (PSOFT) para tugunan ang kakulangan sa access sa digital tools tulad ng laptop, internet, at smart classrooms.
Sa ilalim ng panukala, bawat estudyante sa PSOFT schools ay bibigyan ng sariling laptop, magkakaroon ng internet access, at matututo sa mga digitally equipped classrooms gamit ang mga interactive boards at online learning platforms.
Layunin ng panukala na mapantayan ng mga batang Filipino ang antas ng edukasyon sa mga mas maunlad na bansa.
Sinabi ni Cong. Teodoro na mas magiging interesado at inter-aktibo ang pag-aaral ng mga bata kapag mayroon silang digital learning tools tulad ng e-textbooks at video lessons na tiyak na gaganahan sa pagpasok sa paaralan. (VA)
