Kenyan Runners namayagpag sa 43rd PAL Manila Marathon

PLAZA ULALIM, CCP COMPLEX – Kasabay ng pagbuhos ng ulan, tila bumuhos din ang bangis ng mga banyagang mananakbo na dumomina sa ika-43 Philippine Airlines Manila International Marathon nitong Linggo ng umaga.

Hindi na nagpaligoy-ligoy pa ang Team Kenya – winasiwas ang mga kalaban sa parehong men’s at women’s division ng 42.195-kilometrong karera na dalawang ulit umikot sa Roxas Boulevard at mga lansangan ng CCP.

Hindi na hinintay ni Kripto ang huling kilometro — umalagwa agad sa Buendia Flyover at iniwan ang mga Pinoy na sina Jose Fabito (2:29:58) at Requi Trupa (2:30:57). Tumapos si Kripto sa matinding 2:20:02  bilang overall champion.

Bukod sa tropeo, regalo, at karangalan, bitbit din ni Kripto ang round-trip PAL ticket papuntang Dubai para sa susunod na international marathon.

Hindi rin nagpahuli ang kababayan niyang si Avigail na ginulat ang lahat sa kanyang 2:55:22 finish. Sunod na dumating si Lorely Magalona (3:12:54), at halos isang oras ang pagitan kay Marie Antonette (4:10:53), na ikatlo.

Sa kabila ng biglaang buhos ng ulan at baha sa ilang bahagi ng ruta — lalo na sa Roxas Blvd — walang atrasan ang mga tumakbo! May ilang parte ring inaayos na kalsada ang naging hadlang, pero hindi ito naging dahilan para umatras ang mga masisigasig na kalahok.

Sa 21.1K na Half-Marathon, hindi rin nagpahuli ang mga lokal. Roy Laudit ang unang tumawid sa finish line sa oras na 1:01:35, sinundan nina Jaypee Enano at Leonard Padawan na dikit na dikit sa isat-isa.

Sa kababaihan, lumutang ang pangalan ng beteranang si Jocelyn Elijeran (1:45:37), kasunod sina Cathy at Jenney.

Nagkaroon din ng takbuhan para sa 10K at 5K distances. Para sa kumpleto at opisyal na resulta bisitahin ang manilamarathon.com. (HNT)