Lolong wanted sa rape, sakote sa Valenzuela CPS

SA KULUNGAN bumagsak ang isang 67-anyos lolo na wanted sa kasong incestuous rape matapos matunton ng Valenzuela Police sa kanyang pinagtataguan sa Batangas, kamakalawa ng hapon.

Ayon kay Valenzuela Police OIC chief P/Col. Relly Arnedo, nakatanggap sila ng impormasyon hinggil sa pinagtataguan ng akusadong si alyas Lolo Popoy sa Batangas.

Ang akusado ay nakatala bilang No. 5 Most Wanted Person sa Northern Police District (NPD) at Valenzuela City Police Station.

Agad nagsagawa ng operasyon ang pulisya at  dakong 3:10 ng hapon nitong Martes nang makorner ng pinagsamang operatiba ng Warrant and Subpoena Section at Station Intelligence Section ng Valenzuela CPS ang akusado sa kanyang tinutuluyang bahay sa Ayala Street, San Pascual, Batangas.

Hindi pumalag ang akusado nang bitbitin siya ng pulisya dala ang warrant of arrest para sa kasong Incestuous Rape in relation to RA 7610 na inisyu ng Valenzuela City Family Court Branch 16, noong 14 Marso 2025 na walang inirekomendang piyansa.

Samantala, pinuri ni P/BGen. Josefino Ligan, District Director ng Northern Police District, ang Valenzuela CPS sa kanilang matagumpay na operasyon. (VICK AQUINO)