Dwight Ramos at Utsunomiya Brex, Namayagpag sa Japan B.LEAGUE Final Week sa Manila Game 1 Watch Party

IPINAMALAS ng mga Pilipinong tagahanga ang matinding pagmamahal nila sa basketball sa Japan B.LEAGUE Final Week sa Manila 2025 Game 1 na libreng watch party noong Mayo 24 sa Gateway Mall 2 – UGB Quantum Skyview sa Cubao, Quezon City.

Naging makulay at masigla ang naturang kaganapan habang dagsa ang mga tagasuporta ng Levanga Hokkaido star na si Dwight Ramos, sabik na makita siya nang personal at masaksihan ang inaabangang championship showdown sa pagitan ng Utsunomiya Brex at Ryukyu Golden Kings.

Nagkaroon si Dwight Ramos ng photo session kasama ang mga fans at lalong pinainit ang atmosphere ng event sa kanyang presensya. Siya rin ay nagsagawa ng commentary habang tumatakbo ang laro, kung saan nagbigay siya ng mga makabuluhang pagsusuri na lalong kinatuwa ng mga manonood.

Nag-enjoy ang mga Pilipinong basketball fans sa libreng public viewing party para mapanood nang live ang pagtutuos ng Utsunomiya Brex at Ryukyu Golden Kings mula sa Yokohama Arena sa Japan. Tinutukan ng mga fans ang bawat kapanapanabik na play, kung saan pinatunayan ng Utsunomiya Brex ang kanilang lakas sa pamamagitan ng isang dominating na 81-68 panalo laban sa Ryukyu Golden Kings sa Game 1, na may kasamang mahusay na opensa at depensa.

Ipinamalas ng Utsunomiya Brex ang kanilang husay sa outside shooting sa pamamagitan ng 16 na matagumpay na three-pointers mula sa iba’t ibang manlalaro. Ang kanilang agresibong depensa rin ang pumigil sa Ryukyu Golden Kings na makapuntos nang husto sa buong laro.

Dahil sa pagkapanalo ng Utsunomiya Brex sa Game 1, nananatiling tanong: sino ang mananaig sa Game 2 at lalapit sa pinakaaasam na kampeonato sa B.LEAGUE?

Ang B.LEAGUE Final Week sa Manila 2025 ay naisakatuparan sa tulong at suporta ng Cignal, Embahada ng Japan sa Pilipinas, Japanese Chamber of Commerce and Industry, at ng Samahang Basketbol ng Pilipinas. (HNT)