Sa kanilang ika-32 taon ng pagkakatatag  
JESUS IS OUR SHIELD MAGDIRIWANG “HIMALA” SENTRO NG ANIBERSARYO

NAKATAKDANG ipagdiwang ng Jesus Is Our Shield ang kanilang ika-32 anibersaryo ng pagkakatatag simula noong 1993 na sesentro sa temang “Himala” kaugnay ng kanilang programa na “Oras ng Himala” na napapakinggan sa ilang telebisyon, radio, at social media online flatform.

Ayon kay Apostle Renato Carillo, minsan na siyang namatay at muling nabuhay kung kaya’t naniniwala siyang mayroong himala na nais din niyang maranasan ng lahat ng mga mamamayan.

Aminado si Carillo at ang kanyang maybahay na si Prophetess Elena Carillo na wala silang inaasahang tulong sa kahit sinong politiko sa bansa at wala rin mga sponsor.

Tanging ang pagtutulungan ng mga miyembro at naniniwala sa kanila sampu ng kanilang pamilya kung kaya’t sila ay nakararaos at tumagal nang 32 taon.

Binigyang-linaw ni Carillo, maraming nag-alok sa kanya na iba’t ibang kompanya at kilalang tao sa lipunan para mag-sponsor ngunit kanila itong tinanggihan.

Iginiit ni Carillo na hindi sila umasa sa mga dayuhan ngunit may mga miyembro silang kapwa Filipino na nasa ibang bansa ang maluwag na nagbibigay ng tulong.

Kaugnay nito, inimbitahan ni Carillo ang lahat sa kanilang ilang araw ng pagdiriwang ng anibersaryo simula sa 27 Maro hanggang 30 Marso nang sa ganoon ay maramdaman at masaksihan ng bawat isang dadalo o sasaksi o kahit manood lamang ang himalang hatid ng ating Panginoong Diyos.  (NIÑO ACLAN)