Sports para sa pagkakaisa

SA KABILA ng maulang panahon, nagbigay ng makulay at masayang kapaligiran ang parada ng mga atleta sa pagbubukas ng 11th Brunei Darusalam, Indonesia, Malaysia, Philippines East ASEAN Growth Area (BIMP-EAGA) friendship games kahapon, 1 Disyembre, sa Edward Hagedorn Coliseum.

Ang mga mag-aaral ng Criminology mula sa Palawan State University (PSU) kasama ang mga lokal na grupo ng sayaw ay nagpasaya sa mahigit 700 atleta, coach, at mga opisyal na nagsanib-puwersa upang ipagdiwang ang pagkakaibigan at samahan para sa linggong palaro.

Kasamang dumalo sa kaganapan sina Philippine Sports Commission (PSC) Commissioner Walter Torres, Executive Director Paulo Francisco Tatad, sina Puerto Princesa City Mayor Lucilo Bayron at si Susan Pudin, ang pinuno ng BIMP-EAGA Facilitation Centre, ay nagsabing ang sports fest ay naglalayong magbigay ng positibong epekto sa kultura at economic partners ng mga bansang kalahok.

“We are committed to strengthening our cooperation and solidarity as we set a unified goal of growth and development within our region. As we open this year’s BIMP-EAGA, we emphasized the important role that sports play in achieving meaningful milestones together,” wika ni PSC chairman Richard Bachmann.

“Hayaan ninyong magsilbing inspirasyon ang mga aral mula sa mga palarong ito upang magdulot ng positibong epekto sa inyong mga komunidad,” aniya.

“You are little ambassadors from your home countries, cheer for one another and let the spirit of BIMP-EAGA shine through your actions, humility and good will,” giit ni Pudin.

“Magkasama tayong gagawin ang kaganapang ito bilang isang selebrasyon ng pagkakaibigan, pagtutulungan, at tapat na aspirasyon. Sa mga atleta, hinihikayat ko kayong makipagkompetensiya nang may passion, integridad, at respeto sa isa’t isa,” wika ni Bayron.

Sa kabilang banda, inaasahang maipagkakaloob na ang unang mga medalya sa athletics at swimming events na magsisimula ang mga laban ngayong Lunes, 2 Disyembre, sa Ramon V. Mitra Sports Complex. (HATAW Sports)