Sa Batangas
SCRAP TRADER PINAGBABARIL  SA BAHAY NG KAPATID, PATAY

HINDI umabot nang buhay sa ospital ang isang scrap trader na biktima ng pamamaril ng mga suspek na magkaangkas sa motorsiklo malapit sa bahay ng kaniyang kapatid sa Brgy. Dayap Itaas, bayan ng Laurel, lalawigan ng Batangas.

Kinilala ang biktimang si Rico Obrador, negosyanteng gumagawa ng mga scrap products, namatay habang dinadala sa Batangas Provincial Hospital dahil sa tatlong tama ng bala sa kaniyang katawan.

Pahayag ni P/Maj. Francisco Lucea IV, hepe ng Laurel MPS, kanilang iimbestigahan ang lahat ng anggulo kabilang ang mistaken identity dahil ang napatay na biktima ay kamukha ng kaniyang kapatid.

Ayon sa mga kaanak ng biktima, walang kaaway si Obrador at walang kahiot anong masamang rekord sa komunidad at barangay.

Lumabas sa inisyal na imbestigasyon na may ginagawa ang biktima sa bahay ng kaniyang kapatid nang dumating ang dalawang lalaking sakay ng motorsiklo na armado ng hindi tukoy na baril saka malapitang pinaputukan nang tatlong beses. (BOY PALATINO)