Maja balik-Kapamilya, Kim fans umalma sa special treatment 

I-FLEX
ni Jun Nardo

BALIK-KAPAMILYA na nga ba uli si Maja Salvador dahil sa grand welcome sa kanya sa ASAP?

Isa marahil si Maja sa sinasabing kumalas sa kanilang Kapamilya noong nawalan ng franchise ang ABS-CBN. Sa GMA nakita si Maja sa Eat Bulaga at sitcom with Vic Sotto matapos ang pagkawala ng franchise  ng Dos.

Nagtayo rin ang dancer-actress ng talent management at inasikaso ang personal life.

Kaya naman marami ang nagulat nang makita sa ASAP si Maja. At ipinamalas muli ang galing sa pagsasayaw.

‘Yun nga lang, may mga fan si Kim Chiu na hindi nagustuhan ang treatment kay Maja dahil parang binalewala ang loyalty ng una na hindi iniwan ang ABS-CBN mula nang mawala ang franchise hanggang sa nakababawi na ngayon.

Naku, permanenteng interes lang ang buhay sa showbiz dahil walang permanenteng kaibigan at kaaway sa mundong ito.