Sa lalawigan ng Quezon 
MAGSASAKA PINANINIWALAANG NAMATAY SA TAMA NG KIDLAT

CAMP VICENTE LIM, LAGUNA — Natagpuang patay ang isang lalaki na hinihinalang tinamaan ng kidlat sa Barangay Casasahan Ibaba, Gumaca, Quezon nitong Lunes ng hapon.

Ilang sandali bago mag-6:00 ng gabi, nagresponde ang mga pulis ng Gumaca sa tawag ng mga residente na nagsabing may natagpuang bangkay ng lalaki sa isang bukid at posibleng tinamaan ng kidlat.

Lumalabas sa inisyal na imbestigasyon, natagpuan ni Jay-Ar Canayong, ang bangkay ng kanyang tiyuhin na si Fernando Pagatpat, 59 anyos, magsasaka at tubong Sampaloc, Quezon, na nakahandusay.

Ayon sa pulisya, may indikasyon na ang biktima ay tila nakoryente sa kanang braso.

Sinabi ng misis ng biktima, ang kanyang asawa ay umalis ng kanilang bahay bandang 6:00 ng umaga nang araw na iyon upang pakainin ang kanilang mga alagang hayop ngunit hindi na bumalik.

Hindi kinompirma ng pulisya ang opisyal na dahilan ng pagkamatay ng biktima. (BOY PALATINO)