HATAW! D'yaryo ng Bayan hatawtabloid.com
Dumaguete City — Nagkampeon si Jirah Floravie Cutiyog sa 2024 National Age Group Chess Championships U-16 Girls Elimination FIDE Standard tournament sa Oriental Convention Center sa Dumaguete City noong Martes, 4 Hunyo 2024.
Tinalo ng 15-anyos prodigy si Kristel Love Nietes sa 58 moves ng Scandinavian Defense para masungkit ang korona na may 7.5 points sa weeklong event, punong abala si Negros Oriental Gov. Manuel “Chaco” Sagarbarria sa pakikipagtulungan ni Negros Oriental Congressman Manuel Sagarbarria, na inorganisa ng National Chess Federation of the Philippines na pinamumunuan ng chairman/ president na si Prospero “Butch” Pichay Jr.
“Masayang-masaya ako sa aking pagkapanalo dahil halos lahat ng mga nangungunang manlalaro sa Dumaguete at mga kalapit na probinsiya pati na rin ang mga taga-Metro Manila ay sumali sa torneo,” ani Cutiyog, isang Grade 9 mag-aaral ng Bethel Academy ng Sta Clara General Trias Cavite.
Binuksan ni Cutiyog ang kanyang kampanya sa pamamagitan ng panalo kay Alyssa Gale Deposoy at sinundan ito ng mga tagumpay laban kina Giesel Pacubat (Round 2), Maryss Annxeniel Caldoza (Round 3), Zhaoyu Capilitan (Round 4), Anna Beatrice Bombales (Round 5), Yezka Mendoza (Round 7) at Nietes. Nakipag-draw siya kay Florence Gayle Isabedra sa ikaanim na round.
“It was another awesome performance for Jirah Floravie Cutiyog,” sabi ni Arena FIDE Master Coach Ederwin Estavillo na matagumpay na nagabayan ang City of General Trias chessers sa kanilang successful campaign.
Kabilang sa mga sumusuporta sa kanyang chess campaign dito at sa ibang bansa ay sina Mayor Luis Ferrer IV, Vice Mayor Jonas Glyn Labuguen, Cavite Sixth Dist. Rep. Antonio Ferrer, Sports Head Rodolfo Comandante Jr. at Bethel Academy of Sta Clara General Trias Cavite.
Si Cutiyog ay sariwa pa mula sa pagkapanalo sa 1st HS Tabernilla Surveying and Engineering Services Open Rapid Chess Tournament na ginanap sa City of Imus Sports Complex, Imus, Cavite noong 11 Mayo.
Tinalo niya si International Master Ronald Bancod sa unang round, Clark Kaeron Kwan sa ikalawang round, Arena FIDE Master Castelgandolfo Yray sa ikatlong round, FIDE Master Mark Jay Bacojo sa ikaapat na round, Angele Tenshi Biete sa ikaanim at penultimate round at FIDE Master Roel Abelgas sa ikapito at huling round. Hinati niya ang mga puntos kay International Master Michael Concio, Jr., sa ikalimang round.
Nakuha ni Cutiyog ang 3-gold at 1 silver sa chess na kumakatawan sa City of General Trias sa DepEd Calabarzon 2024 Regional Athletic Association meet (RAAM) Secondary Girls Chess Tournament na ginanap noong 5-13 Abril 2024 sa Emmanuel Christian School, City of Santa Rosa, Laguna.
Nanalo si Cutiyog sa Secondary Girls blitz (indibidwal) at Standard (Indibidwal) na kaganapan na may katulad na perpektong 7.0 puntos.
Nakita ni Cutiyog ang aksiyon sa 2023 World Youth Chess Championship na ginanap sa Montesilvano, Italy noong Nobyembre.
Ang kanyang susunod na torneo ay ang National Age Group Chess Championships Grand Finals 2024 na gaganapin sa 22-30 Hunyo sa Dapitan City Sports Complex, Zamboanga del Norte at ang Eastern Asia Chess Championships sa 12 Hulyo hanggang 21 Hulyo sa Penang, Malaysia. (MARLON BERNARDINO)
