IM Concio, Jr., nagkampeon sa 64th San Carlos Charter Day Open Rapid Chess Tournament

SAN CARLOS CITY — Nagwagi si International Master (IM) Michael Concio, Jr., sa 64th San Carlos Charter Day Open Rapid Chess Tournament sa Marina Park, San Carlos City, Negros Occidental nitong Linggo, 2 Hunyo 2024.

Nagtala si Concio ng 8.5 puntos upang angkinin ang pitaka ng kampeon na P54,000 at isang tropeo sa nine-round Swiss system tournament, na pinagsama-samang inorganisa ng San Carlos City LGU at sportsman/businessman na si Henry Silva.

“Nais kong ialay ang tagumpay na ito sa yumaong (Cavite 4th District) na si Cong. Elpidio “Pidi” Barzaga, Jr., Mayor Jenny Barzaga, at national coach FIDE Master Roel Abelgas,” sambit ng 18-anyos Information Systems freshman sa Kolehiyo ng Lungsod ng Dasmariñas City, Cavite.

Tinalo ni Concio sina Nina Dela Torre sa unang round, Trine Olmedo (2nd), Edsel Vosotros (3rd), Melito Ocsan, Jr. (4th), NM Edsel Montoya (5th), Kevin Arquero (6th) GM Darwin Laylo (7th), at FM Alekhine Nouri (ika-8).

Na-draw niya si Michel Jacson Ambuang sa ikasiyam at huling round.

Si IM Jan Emmanuel Garcia mula Maynila, ay tumanggap ng P20,000 para sa pagtatapos na pangalawa habang ang third placer na si Nouri ay nag-uwi ng P15,000.

Pang-apat si Laylo, kasunod sina Chin Lim, Ambuang, Arquero, Montoya, FM Christian Gian Karlo Arca, at NM Rommel Ganzon. (MARLON BERNARDINO)