HATAW! D'yaryo ng Bayan hatawtabloid.com
DUMATING sa lamay ni founding leader at Chief Executive Minister ng Pentecostal Missionary Church of Christ (PMCC) na si Apostle Arsenio Ferriol sa Imus, Cavite ang ilang batikang politiko na kinabibilangan ng mga opisyal ng lokal na pamahalaan, mga kongresista at mga senador upang ipaabot ang kanilang pakikiramay sa pamilyang naiwan ni Apostle Ferriol.
Kabilang sa mga dumating si Senador Sherwin “Win” Gatchalian na nagpahayag ng kalungkutan sa pagkawala ng kaibigang leader ng PMCC.
Aniya, napakabuting leader, kaibigan at mensahero ng Panginoon si Apostle Ferriol, at malaking kawalan para sa mga kababayan dahil sa kanyang patuloy na pagtulong sa lahat ng mamamayan na walang pinipiling relihiyon na kinaaniban.
Ayon kay Bishop Jonathan Ferriol, anak at Deputy Executive Minister ng PMCC, bukod kay Gatchalian dumating rin sa lamay ng kanyang ama ang ilang alkade ng iba’t ibang lungsod at munisipalidad, ang mga mambabatas na sina Senador Christopher “Bong” Go, Senator Francis Tolentino, Senador Joel Villanueva, at marami pang iba.
Aniya, kaya tinawag na Goodman of the House si Apostle Ferriol dahil lahat ay kanyang kaibigan at tinutulungan kahit anong partido pa ang kinaaaniban.
Tiniyak ni Bishop Jonathan Ferriol na kanilang ipagpapatuloy ang kanilang outreach program tulad ng medical mission matapos ang kanilang pagluluksa sa malaking kawalan ni Apostle Ferriol.
Sa huli, binanggit ni Bishop Ferriol na nakatakdang dalhin sa huling hantungan ang kanyang ama na si Apostle Arsenio Ferriol sa 18 Hunyo sa Malagasang sa Imus, Cavite. (NIÑO ACLAN)
