HATAW! D'yaryo ng Bayan hatawtabloid.com
Camp BGen Paciano Rizal – Arestado ang most wanted person ng CALABARZON sa manhunt operation ng Calauan MPS kamakalawa ng hapon.
Kinilala ni P/Col. Gauvin Mel Y. Unos, Acting Provincial Director, Laguna Police Provincial Office, ang akusado na si alyas John, residente sa Calauan, Laguna.
Sinabi sa ulat ni P/Maj. Melencio V. Arcita, hepe ng Calauan Municipal Police Station MPS, nagkasa ang kanilang mga operatiba ng manhunt operation dakong 4:55 pm nitong 16 Mayo 2024 sa Brgy. Lamot 2, Calauan, Laguna na nagresulta sa pagkakaaresto ng nasabing akusado.
Si alyas John ay inaresto sa bisa ng warrant of arrest na inilabas ng Assisting Judge of Regional Trial Court, Branch 107, Los Baños, Laguna na nilagdaan ni Hon. Rene Deveza Natividad, Presiding Judge ng nasabing korte.
Nahaharap ang akusado sa kasong Murder at Frustrated Murder” na walang kaukulang piyansa.
Sa kasalukuyan ang arestadong akusado ay nasa kustodiya ng Calauan MPS. Agad inimpormahan ang korteng pinagmulan ng Warrant of Arrest sa pagkakaaresto ng akusado.
Sa mensahe ni Acting Provincial Director ng Laguna PPO na si P/Col. Unos, “Sa pagkakaaresto sa taong ito, makakamit na rin ng mga biktima ang hustisya. Maraming salamat sa mga mamamayan ng Laguna na tumutulong upang mahuli at mapanagot ang mga nagtatago sa batas.” (BOY PALATINO)
