HATAW! D'yaryo ng Bayan hatawtabloid.com
KASUNOD ng pagpapaabot ng taos-pusong pakikiramay sa pagkamatay ng tatlong overseas Filipino workers (OFWs) sa Dubai, United Arab Emirates (UAE) dulot ng pagbaha kamakailan, nanawagan si Senador Manuel “Lito” Lapid sa pamahalaan na marapat igawad ang lahat ng tulong sa kanilang mga naulila.
Ayon kay Lapid, ang pagbaha po sa Dubai, UAE ay isang malagim na paalala ng patuloy na lumalaking hamon ng pagbabago ng klima sa ating daigdig. Saan man tayo sa mundo ay hindi po natin dapat isawalang bahala ang panganib na maaaring maranasan ng ating mga kababayan na nagsasakripisyo para matustusan ang kanilang mga pamilya.
Iginiit ni Lapid, sa panahon sa kasalukuyan ay maraming digmaan, lindol, at iba pang mga kalamidad, dapat manatiling handa ang ating mga kababayan at pamahalaan na tumugon sa mga hamon kahit kailan ito dumating.
“Sila ang mga tunay na bagong bayani na nagbubuwis ng buhay para sa kanilang pamilya at ekonomiya ng bansa,” ani Lapid.
Kaugnay nito, hiniling ni Lapid sa pamunuan ng DMW-OWWA na agad asikasohin ang mga labi ng OFWs para maiuwi sa Filipinas at maibigay kaagad ang mga benepisyong nararapat na matanggap ng kanilang mga kaanak.
“Muli, kasama ang aking pamilya, nakikiramay po ako sa lahat ng mga naulila at mga mahal sa buhay ng tatlong OFWs sa Dubai,” pagwawakas ni Lapid. (NIÑO ACLAN)
