Isko at Paolo pangmatagalan ang kontrata sa Eat Bulaga 

I-FLEX
ni Jun Nardo

PANGMATAGALAN ang kontratang pinirmahan nina Isko Moreno at Paolo Contis bilang hosts ng bagong Eat Bulaga.

Naganap ang contract signing last Saturday bago ang Eat  Bulaga sa APT Studio.

Bukod kina Isko at Paolo, present sa contract signing ang Jalosjos brothers na sina Bullet at Jonjon, Joy Marcelo ng GMA Artist Center at legal counsel ng APT na si Atty. Maggie Abraham Garduque.

Hindi man sinabi ni Isko kung gaano katagal ang kontrata nila ni Paolo sa show, “Basta mananatili ang saya at tulong na inihahain namin sa tao.”

 Para kay Bullet, “First time na nangyari ito sa mga host na may contract signing. Soon, ang mga empleado naman ang magkakaroon ng contract signing.

“Para sa kanilang security of tenure ang ginawa ng TAPE. At gusto lang naming sabihin na walang katotohanan ang kumakalat na tsismis na hanggang July 29 na lang sa GMA ang ‘Eat Bulaga’ at magtatapos na ito.”

“Ang totoong magtatapos ay ang 43rd year ng ‘Eat Bulaga’ dahil papasok na ito sa 44th year sa July 29,” pahayag naman ni Atty. Maggie.

“Basta marami kaming sorpresa lalo na’t ikinatutuwa namin na mataas ang ratings ng ‘Eat Bulaga’ sa Visayas at Mindanao!” sabi naman ni Jonjon.

Kampante na ngayon ang pamunuan ng TAPE sa itinatakbo ng bagong Bulaga at madaragdagan pa ang sorpresang handog nila sa manonood!