HATAW! D'yaryo ng Bayan hatawtabloid.com
MANILA — Nakatakdang sumabak si National Master (NM) Oscar Joseph “OJ” Cantela ng General Trias City, Cavite sa World Youth Chess Championships na gaganapin sa 12-25 Nobyembre sa Montesilvano, Italy.
Matapos ang boys under-17 division ng Mayor Seth Frederick “Bullet” P. Jalosjos National Youth and Schools Chess Championships Grand Finals bilang Co-Champion (Standard Time Control) sa Dapitan City, Zamboanga del Norte noong 8 Hunyo, ang 15-anyos na si Cantela ay nagtakda ng kanyang bisyon sa isang mas mataas na layunin.
Plano ni Cantela na itaas ang kanyang standard rating na 1692 sa mahigit 2000 ngayong taon. Nasa track din siya para sa mailap na FIDE Master (FM) title at titulong International Master (IM).
Si Cantela, isang Grade-10 student sa Far Eastern University-Diliman, naglalaro sa ilalim ng patnubay ni coach Grandmaster Jayson Gonzales, ay pasok rin sa runner-up place sa boys under-16 division Mayor Darrel Uy National Age Group Chess Championships Grand Finals sa Dipolog City, Zamboanga del Norte noong 8 Hunyo.
Pumangalawa siya sa National School and Youth and Schools Chess Championships Elimination sa Himamalayan City, Negros Occidental noong 16 Abril
.
Ang iba pang tagumpay ni Cantela ay pagpuwesto bilang pang-apat sa pangkalahatan sa National Junior Chess Championships sa Alicia, Isabela noong 30 Mayo at ika-3 puwesto sa boys under-16 division sa Vice Gov. Athena Bryana D. Tolentino National Age Group Chess Championships na ginanap noong 5 Marso.
“”OJ Congratulations we are very proud of you anak, masaya kami ng mama mo sa lahat ng achievements mo! Sana ay ipagpatuloy mo ang iyong paglalakbay at huwag kang susuko. Laging tandaan na lagi kaming nandiyan para gabayan ka at suportahan ka saan man pumunta… Nagpapasalamat kami sa Diyos sa kanyang napakagandang pagpapala,” sabi ng amang si Kevin Cantela.
“Nagpapasalamat po ako sa aking pamilya sa pagbibigay nila ng suporta kay OJ, especially to my two loving sisters in USA sis Marilyn Cantela Cason & sis Alma Cantela at sa FEU po,” ani Kevin.
“I will do my very best for our flag country,” sabi ng batang OJ Cantela, nanalo rin sa Eugene Torre Chess Cup, Chooks to Go National Age Group Chess Championship at Philippine Academy for Chess Excellence Grandfinals. (MARLON BERNARDINO)
