HATAW! D'yaryo ng Bayan hatawtabloid.com
BINAWIAN ng buhay ang isang bata sa bayan ng San Rafael, sa lalawigan ng Bulacan, nang malunod sa irigasyon habang nagtatangkang kunin ang nahulog niyang tsinelas nitong Sabado, 3 Disyembre.
Kinilala ang biktimang si Anthony Basquiña, 11 anyos, isang Grade 5 student.
Ayon sa lola ni Anthony na si Juanita Bagay, nagpunta sa naturang irigasyon ang kaniyang apo noong Sabado upang manood ng mga namimingwit ng isda nang malaglag sa tubig ang kanyang tsinelas na agad niyang sinubukang kunin.
Tinangka pang sagipin si Anthony ng mga residente ngunit nabigo sila dahil sa lakas ng agos ng tubig.
Tumagal ng anim na oras bago nakuha ng rescue team ang katawan ng biktima na kasalukuyan nang nakaburol sa kanilang bahay.
