HATAW! D'yaryo ng Bayan hatawtabloid.com
SINUSUPORTAHAN ni Senadora Pia Hontiveros ang panawagan na buwagin ang Procurement Service ng Department of Budget Management (PS-DBM) dahil ito ay breeding ground ng korupsiyon.
Tahasang ipinahayag ito ni Senadora Risa Hontiveros sa isang panayam sa radyo kamakalawa.
Ayon kay Hontiveros, maituturing niyang naging kasangkapan ang Procurement Service – Department of Budget and Management (PS-DBM) upang malustay ang pera ng taongbayan.
Kabilang sa ibinunyag ni Hontiveros ang ‘nakaparadang’ P6.5 bilyon sa PS-DBM na natuklasan ng Commission on Audit (COA) na hindi nagamit at ang iba ay nai-advance na.
Tinukoy ni Hontiveros, kabilang sa ahensiya ng pamahalaan na may nakaparadang pondo sa P6.5 bilyon ang Department of Agrarian Reform (DAR), Bureau of Fire and Protection (BFP), Bureau of Immigration (BOI), at Philippine National Police (PNP).
Nanghihinayang si Hontiveros, imbes napakinabangan ng mga ahensiya para sa kanilang mga tauhan at mamamayan ay nabalewala dahil ‘nakaparada’ lang sa PS-DBM.
Partikular na tinukoy ni Hontiveros ang P1.6 milyong pondo ng PNP na noon pang 2020-2021 nakaparada sa PS-DBM imbes ipinambili ng mga kagamitan para makapagbigay ng higit na serbisyo ang pulisya sa mga mamamayan.
Ipinunto ng Senadora, mahigit isang dosenang ahensiya ng pamahalaan na mayroong bilyong pisong inilagak sa PS-DBM ang nakaparada at nasayang lamang.
Itinuturing ni Hontiveros, ito ay pagsasamantala ng PS-DBM.
Aniya, bukod sa mga natukalasang kontrobersiyal na P42 bilyong pondo ng Department of Health (DOH) para ipambili ng personal protective equipment (PPE) noong kasagsagan ng pandemyang dulot ng CoVid-19.
Nangangamba si Hontiveros na mukhang marami pang ahensiya o departmento ng pamahalaan ang naglagak ng pondo sa PS-DBM gayong ang trabaho nila ay taliwas sa ginagawang transaksiyon.
Sa kabila ng pakiusap ng bagong pinuno ng DBM na bigyan ng pagkakatong repasohin at ayusin ang PS-DBM ay sinusuportahan ni Hontiveros ang mga panukalang pagbuwag dito. (NIÑO ACLAN)
