HATAW! D'yaryo ng Bayan hatawtabloid.com
IBINULSA ni Filipino pole vault sensation EJ Obiena ang kanyang ikaanim na gintong medalya ngayong taon pagkaraang pagharian niya ang Jump and Fly tournament nung Linggo sa Hechingen, Germany.
Nilundag ni Obiena ang 5.80 meters sa kanyang ikatlo at pampinaleng attempt para sa gintong medalya. Ang maganda niyang performance sa nasabing torneyo ay pambawi niya sa pangit na inilaro sa Stockholm Diamond League noong June 30 na kung saan ay pumuwesto lang siya ng pang-anim.
May pagkakataon sanang burahin ni Obiena ang itinakda niyang Asian record na 5.93 meters pero bigo siyang malundag ang 5.94 mark.
Pumangalawa sa torneyo si Chinese pole vaulter Huang Bokai na may naklarong 5.50 meters, samantalang si German Ace Vincent Hobbie ay tumapos ng third place na may 5.1 meters.
Ang Jump and Fly tournament ay ikalawang torneyo na pinagwagian ng ginto ni Obiena ngayong linggo. Sa Taby Stavhoppsgala tournamant sa Sweden ay nagtakda siya ng personal season-best mark ng 5.92 meters.
Pinagharian din ng Filipino pole vault star ngayong taon ang 31st Southeast Asian Games sa Vietnam, European City of Sports event sa Italy, Orlen Cup at Orlen Copernicus Cup sa Poland.
Nakatakdang lumahok si Obiena sa 2022 World Athletics Championships mula July 15 hanggang 24 sa Oregon.
