Zolani Tete giniba si Jason Cunningham sa 4^th round

NASA radar na muli ni dating two-weight world champion Zolani Tete ang isa pang pagkakataon para mapalaban sa titulo nang gibain niya si Jason Cunningham sa 4^th round ng magharap ang dalawa sa Commonwealth super-bantamweight title fight sa Joyce-Hammer  sa Wembley.

Naging brutal ang pinakawalang suntok ni Tete na nagpabagsak sa lona kay Cunningham, at nang bumangon ito ay pinaulanan na niya ito ng suntok  para itigil ng reperi ang laban.

Maganda ang naging comeback fight ni Tete pagkatapos na wasakin siya ni John Riel Casimero ng Pilipinas para mawala sa kanya ng korona sa WBO bantamweight  noong 2019.

Naging masakit naman para kay Cunningham ang pagkatalo dahil rumerekta ang kanyang boxing career nang manalo siya ng British, Commonwealth at European titles.   Dahil sa mga naunang panalong iyon kung kaya umakyat siya sa ibang level ng kompetisyon para mahanay sa mga world class boxer, pero tipong kinapos siya ng kalkulasyon.

Sa naunang tatlong rounds, nakontrol agad ni Tete ang laban sa pamamagitan ng matutulis at malulutong na jabs, samantalang nangangapa naman si Cunningham na kumonekta.

Nakakita ng pagkakataon si Tete sa 4^th round at pinawalan niya ang matinding left hook  para bumagsak si Cunningham.  At nang bumangon siya, hindi na siya tinigilan ni Tete.  Doon na sumenyas si referee Howard Foster na tapos na ang laban bago pa tuluyang masira si Cunningham.

Binigyan ng paunang lunas ng paramedics si Cunningham at nagbalik ang kanyang diwa pagkaraan ng apat na minuto.   Nagtapos ang laban sa 34 seconds ng 4^th round.

Napanalunandin ni Tete ang Commonwealth title, ang IBF at WBO International belts na nakataya sa laban.