HATAW! D'yaryo ng Bayan hatawtabloid.com
Sugatan ang isang menor de edad na lalaki matapo saksakin ng isang tricycle driver na sinasabing nakahuli sa kanyang nagnakaw ng mga manok na panabong sa Sitio Tuyuman, Brgy. Caradio-an, lungsod ng Himamaylan, lalawigan ng Negros Occidental, nitong Linggo, 5 Hunyo.
Ayon kay P/Lt. Markelly Laganipa, deputy chief ng Himamaylan CPS, binabantayan ng biktimang kinilalang si Regie Castino, 33 anyos, ang kanyang mga manok na panabong nang makita umano niya ang hindi kilalang lalaking ninanakaw ang mga tandang na nakatali sa kanyang bakuran.
Hinabol ni Castino ang magnanakaw at nang mahuli ay dalawang beses na sinaksak ang 17-anyos na suspek.
Nagawang makatakas ng menor de edad na suspek ngunit nahuli kalaunan ng kapitbahay ng biktima sa isang taniman ng tubo
Narekober ng mga pulis sa suspek ang isang backpack na naglalaman ng dalawang manok na panabong na nagkakahalaga ng P2,500 bawat isa.
Dinala ang suspek sa Gov. Valeriano Gatuslao Memorial Hospital sa naturang lungsod.
Dagdag ni Laganipa, naiulat na nanakawan din ng mga manok ang biktima sa mga nakalipas na araw ngunit hindi matukoy ni Castino kung ang menor de edad na suspek rin ang nasa likod ng mga insidenteng iyon.
Samantala, nag-usap na umano ang dalawang panig kaugnay sa initial settlement.
