Desisyon ng Comelec, irespeto — Lacson

NANAWAGAN si presidential aspirant senator Panfilo “Ping” Lacson sa lahat na irespeto ang nagging desisyon ng Commission on Elections (Comelec) sa pagbasura sa isa sa petisyong humihiling na ipawalang-bisa o ibasura at kanselahin ang certificate of candidacy (COC) ni presidential aspirant at dating Senador Ferdinand “Bongbong” Marcos, Jr.

Sa ibinasurang petsiyon, binigyang-diin ang paghatol kay Marcos ng Quezon City Regional Trial Court (RTC) ng “guilty” sa kabiguang magdeklara at magbayad ng kanyang Income Tax Return (ITR).

Ayon kay Lacson, kung mayroong tamang lugar na magdesisyon walang iba kundi ang mismong Komisyon.

Binigyang-linaw ni Lacson, sa Komisyon inihain ang petisyon lalo na’t may kinalaman sa kandidatura ni Marcos kung kaya’t sila rin ang maglalabas ng desisyon at wala nang iba pa.

“There are venues provided by electoral system to ensure fairness for all concerned and we should respect them as well,” ani Lacson.

Sa kabila nito, rerespetohin rin umano ni Lacson ang desisyon at hakbanging gagawin ng mga naghain ng petisyon.

Bukod sa naunang petisyong ibinasura, mayroon pang dalawang petisyon ang nakabinbin sa Komisyon at inaasahang reresolbahin ito sa lalong madaling panahon. (NIÑO ACLAN)