Sean de Guzman ratsada sa paggawa ng pelikula

REALITY BITES
ni Dominic Rea

HINDI naging madali kay Sean De Guzman ang kasikatang tinatamasa niya ngayon. Ilang taon muna siyang naging miyembro ng grupong Clique V ni Len Carrillo. Pakanta-kanta at pasayaw-sayaw sa mga event na kung saan sila naiimbitahan. 

Minsan naman ay rumaraket sila out of town. May mga kasong libre lang din ang kanilang ginagawang appearance. Pero hindi napagod ang isang Sean De Guzman. Hanggang sa mabigyan ng magandang break bilang lead actor sa pelikulang Anak Ng Macho Dancer ni Joel Lamangan. 

Mula noon ay nagtuloy-tuloy na ang magagandang projects ni Sean at pumirma na rin sila ni Len ng kontrata sa bakuran ng Viva Artist Agency. 

Hindi puwedeng hindi mabigyan ng project si Sean dahil marunong itong umarte at palaban kung hubaran ang pag-uusapan. Kaya naman dahil sa ratsadang paggawa ng pelikula kahit sa panahon ng pandemya ay binansagan si Sean bilang ” Pandemic Actor ” at naging pandemic actress naman ang kasamahan niyang bidang seksing aktres na si AJ Raval sa pelikulang Hugas ni Roman Perez! 

Mapapanood ang Hugas sa VivamaxPH.