Mundo ni Lena magbabago na

FACT SHEET
ni Reggee Bonoan

MAGBABAGO na ang mundo nina Lena (Erich Gonzales) at Lukas (Raymond Bagatsing) dahil matutuklasan na nilang magkadugo at mag-ama sila ngayong linggo sa La Vida Lena, na napapanood gabi-gabi sa Kapamilya Channel, A2Z, at TV5.

Sa isang enggradeng party, magkakaroon ng matinding komprontasyon sina Lena at Lukas sa harap ng kanilang mga pamilya at kasosyo sa negosyo.

Pero emosyonal na papagitna sa kanila si Ramona (Janice De Belen) at ibubulgar nito ang katotohanang mag-ama ang dalawa na ikagugulat ng lahat.

“Sa dinami-dami ng pwede kong maging tatay, bakit si Lukas Narciso pa? Siya ang dahilan ng lahat ng paghihirap ko noon!” daing ni Erich pagkatapos mabasa ang positibong resulta ng DNA test nilang dalawa.

Subaybayan ang ikatlong season ng La Vida Lena mula Lunes hanggang Biyernes, 10:00 p.m.