HATAW! D'yaryo ng Bayan hatawtabloid.com
HINULI ng mga operatiba ng Intelligence Section ng Pasay City Police ang tatlong Chinese nationals at isang Pinoy na isinasangkot sa pagdukot sa isa pang Chinese sa isang entrapment operation sa Parañaque City nitong 15 Oktubre.
Iniharap kay Southern Police District (SPD) Director P/BGen. Jimili Macaraeg ang nga naarestong suspek na sina Zhao Lingdi, 24; Feng Xialong, 31; Hao Zhengdong, 40; at Aaron Montenegro, 40.
Sa report, ang Chinese national na si Chen Yuansen, 21, kinidnap ng mga suspek sa Sea Escape CCP Complex, Barangay 76, Zone 10, Pasay City noong 2 Oktubre 2021.
Dinala at ikinulong ang biktima sa isang POGO company, matatagpuan sa Williams St., Pasay City.
Humingi ang mga suspek ng halagang P300,000 sa biktima upang hindi siya paslangin .
Lingid sa kaalaman ng mga suspek, nagawang makatawag ng biktimang si Yuansen sa kanyang kaibigan na si Jin Zhongguo na nagpanggap na isang kaibigan na magdadala ng ransom money.
Agad nagkasa ng entrapment operation ang mga awtoridad na nagresulta ng pagkakaaresto ng apat na suspek sa harap ng Sequoia Hotel sa Block 2 Lot 15, Aseana City, Business Park, Paran~aque City, dakong 8:30 pm.
Narekober sa mga suspek ang puting Toyota Hi Ace commuter van, may plakang NEF 4546, nakarehistro kay Hui Zhang.
Nakakulong ang apat na suspek sa Pasay City Detention Management Unit at inihahanda ang kaukulang kaso laban sa mga suspek.
(GINA GARCIA)
