HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
TILA nairita si Mikee Morada sa ipinost ni Lolit Solis sa kanyang Instagram account ukol sa balitang nakunan daw ang kanyang asawang si Alex Gonzaga. Kaya naman nagpahayag ito ng pagkadesmaya at humingi ng respeto.
Inamin din ni Mikee na nasaktan siya sa IG post ni Manay Lolit.
Post ni Manay Lolit, ”Naawa naman ako sa balita na nakunan daw si Alex Gonzaga. Kasi nga worried na worried ang mga followers niya at gusto malaman ang tutoong nangyari pero may nagsabi na sa vlog na lang daw ni Alex o Toni Gonzaga hintayin.
“Para bang ginawa ng business pati malungkot na balita. Siyempre para sa sinuman babae very sad na mawala ang baby mo, lalo at first baby nilang mag-asawa.
“Hindi naman siguro totoo na nagagalit ang mother Pinty nila Alex at Toni na lumabas ang balita dahil gusto nga daw nila na maging exclusive sa vlog nila.
“Very petty ‘di ba? Dahil lang sa vlog pati ganitong balita itatago? Eh married naman si Alex, at paano itatago iyon medical record?”
Sa kabilang banda, nagbigay pa ng mensahe si Manay Lolit kay Alex, ”At be strong. Magkakaruon ka pa uli ng baby, we pray for that. Amen.”
Hindi ito nagustuhan ni Mikee kaya naglabas siya ng saloobin. Aniya, nasaktan siya sa post ng manager at humingi ng respeto para sa kanilang mag-asawa.
“Mam masakit at nakakadismaya naman. Hindi lang patungkol kay Alex ang inyong sinulat, tungkol ito sa amin mag-asawa.
“Kaya hinihingi ko ang inyong pag-respeto. Huwag po kayong gumawa ng kwento sa ganitong klaseng sitwasyon lalo’t hindi niyo naman alam ang totoong pangyayari. Salamat,” ani Mikee.
