Pagpapa-sexy ni Mark Anthony late na

HATAWAN
ni Ed de Leon

ANG pagpapa-sexy kailangan nasa tamang timing din. Kung natatandaan ninyo, noong medyo bumababa na ang popularidad niyong Gwapings noong araw, at hindi na umuubra sa fans ang kanilang pagsasayaw at pagpapa-cute lamang, nagsimula nang magpa-sexy si Eric Fructuoso, at kinagat naman iyon ng fans dahil pogi, bagets, at
nagpa-sexy pa.
Tinalbugan naman iyon ni Jomari Yllana na mas naging daring hindi lamang sa kanyang mga pictorial kundi maski na sa mga ginawa niyang pelikula. Talagang matindi ang ginawa niyang pagpapa-sexy noon kaya halos walang nakalaban sa kanya. Noong panahong iyon, nagpaka-conservative si Mark Anthony Fernandez at hindi nakipagsabayan sa bold, kahit na nauna na ang dalawang Gwapings.

Aba, ngayon kung kailan 40 na siyang mahigit at saka pa siya sumabak sa pagsusuot ng underwear at tila iyon pa ang pinalalabas na come on sa kanyang come back movie. Eh sino nga ba ang manonood pa sa isang naka-underwear na tatay eh garapalan na nga ngayon ang ginagawa ng mga artistang lalaki sa kanilang mga internet movie. Mag-isip nga kayo.