HATAW! D'yaryo ng Bayan hatawtabloid.com
NADAKIP ang 12 sugarol kabilang ang walong sabungero sa magkahiwalay na pagsalakay nitong Linggo, 7 Pebrero, sa lungsod ng Gapan at Science City of Muñoz, sa lalawigan ng Nueva Ecija.
Ayon sa ulat ni P/Col. Jaime Santos, naaktohan ng mga operatiba ng Gapan city police station ang walong sabungero sa tupada na kinilalang sina Jefferson Velasco, financier; Joselito Catacutan, Rolando Rason, Juanito Ybañez, Christopher de Guzman, Ruben Santos, Johny Ortiz, at Wilson Trinidad.
Nakompiska mula sa mga suspek ang dalawang mamahaling manok na Texas, mga tari, at P4,720 cash na taya.
Samantala, naposasan ng Science City of Muñoz PNP ang apat na sugarol na nahuling nagpupusoy na kinilalang sina Crisanto de Guzman, Bernardino Indab, Ramil Tubay, at Ranilo Ramos, mga residente ng nasabing lugar.
Nasamsam mula sa kanila ang pinaglalaruang baraha at tayang P2,272.
Kakasuhan ang mga nadakip na suspek ng paglabag sa safety health protocols at PD 1602 na kasalukuyang nakapiit sa mga kaukulang PNP custodial facility. (RAUL SUSCANO)
