HATAW! D'yaryo ng Bayan hatawtabloid.com
TIMBOG sa entrapment operation ang suspek na kinilalang si Jayson Crisostomo, 27 anyos, residente sa lungsod ng Navotas, sa buy bust operation na ikinasa ng pinagsanib na puwersa ng PDEA 3, PDEA 4-A, at PDEA 1 sa kahabaan ng McArthur Highway, Balibago, sa lungsod ng Angeles, sa lalawigan ng Pampanga, nitong Miyerkoles ng gabi, 2 Disyembre.
Ayon kay PDEA Director Christian Frivaldo, itinuturing na high value target ang suspek na supplier ng malakihang bulto ng ilegal na droga sa mga lungsod ng Angeles at Mabalacat, at ibang mga bayan ng Pampanga at Tarlac.
Nakompiska ng anti-narcotics operatives mula sa suspek ang 500 gramo ng shabu na nagkakahalaga ng P3,400,000, isang cellphone, timbangan, P1,000 marked money, at limang bulto ng boodle money na ginamit sa operasyon.
Kasong paglabag sa Section 5 (Sale of Dangerous Drug) ng Article ll ng RA 9165 ang ihahain laban kay Crisostomo na nasa kustodiya ng mga raiding team. (RAUL SUSCANO)
