Pangulong Digong idinepensa vs kritiko

IPINAGTANGGOL ni Senate committee on health chairman Senator Christopher “Bong” Go si Pangulong Rodrigo Duterte laban sa mga puna nang mag-alis ng face mask habang nakikipag-usap sa ilang opisyal at residente sa kanyang pagdalaw sa mga nasalanta ng bagyong Rolly sa ilang bahagi ng Bicol.

Ipinaliwanag ni Go, nahihirapang marinig ng pangulo ang mga sinasabi sa kanya ng mga residente kaya siya nag-alis saglit ng mask pero agad din itong ibinalik.

Sinabi ni Go, nahihirapan din magsalita ang pangulo kaya napilitan siyang magtanggal para marinig din ng mga residente ang kanyang sinasabi kasabay ng pagtitiyak na hindi masyadong malapit ang pangulo sa pakikipag-usap.

Giit ni Go, tiniyak nilang nasunod ang iba pang health at safety protocols para makaiwas sa CoVid-19.

Binigyang diin ni Go, imbes punahin at batikusin ang pagkilos ng pangulo ay mas mabuting tumulong sa mga kababayang nasalanta ng bagyong Rolly at iba pang kalamidad.

(CYNTHIA MARTIN)