Welder arestado (Pagnanakaw nakunan ng CCTV)

SA TULONG ng closed circuit television (CCTV) camera, arestado ang isang welder matapos makunan ang ginawa nitong pagpasok at pagnanakaw sa bahay ng kanyang kapitbahay sa Malabon City.

Kinilala ni Malabon police chief P/Col. Angela Rejano ang naarestong suspek na si Marcial Demata, 36 anyos, residente sa 2/F ng Bernabela Realty Residence sa Blk 1 Lot 12 Pampano St., Baranagy Longos, na nahaharap sa patong-patong na kaso.

Sa imbestigasyon nina P/SSgt. Jose Romeo Germinal at P/SSgt. Jeric Tindugan, naghahanda para sa kanilang family bonding ang biktimang si Chelsea Monelli Sacramento, 28 anyos, accountant, sa loob ng kanilang unit sa 3/F ng Bernabela Residence nang mapansin na nawawala ang kanyang cellphone at sapatos.

Nang suriin ang CCTV footages, natuklasan niya na ang kanyang kapitbahay ang pumasok sa kanilang unit at kinuha ang kanilang cellphone, mga sapatos at tsinelas.

Humingi ng tulong ang biktima sa Malabon Police Sub-Station 5 na nagresulta sa pagkakaaresto sa suspek at nabawi ang cellphone na P8,000 ang halaga at pares ng sapatos na P5,000 ang halaga habang hindi na nabawi ang dalawang pares ng sapatos na P10,000 ang halaga at dalawang pares ng tsinelas na P4,000 ang halaga.

Rommel Sales