HATAW! D'yaryo ng Bayan hatawtabloid.com
MUKHANG kailangan ng “professional help” ng Mayor’s Task Force Disiplina at ng barangay officials sa Barangay South Triangle sa Quezon City.
Hindi natin akalain na mailabas nila ang ‘berdugo’ sa kanilang mga pagkatao dahil sa isang ‘pasaway’ na vendor na kung tutuusin ay simple lang ang pinagmulan — walang suot na facemask.
Naitanong kaya muna no’ng mga barangay kagawad kung bakit walang suot na facemask ang nasabing vendor?
Palagay natin e hindi nila nakausap kaya hindi nila nalaman na ‘yung tao ‘e hindi na makabalik sa kanila kaya nagtitiyagang manirahan sa bangketa.
Gumawa ng maliit na sistema na makapagtinda ng isda para kumita, pero nabugbog siya.
E kung ang ginawa ng barangay ‘e binigyan ng face mask ‘yung vendor at kinausap maigi kung ano ang problema niya, e di hindi sana nauwi sa bugbugan.
At ‘yun ang ipinagtataka natin, bakit kailangang bugbugin ‘yung vendor, pagsalikupan na parang kriminal, at binuhat na parang baboy saka inihagis sa sasakyan.
Bakit kailangan manakit ng barangay officials o ng Task Force Disiplina ng QC Office of the Mayor gayong hindi kriminal ang gusto nilang ‘disiplinahin.’
Samantala sa holdaper, kapag natutukan ng kutsilyo o baril, magpapasalamat pa kapag kinuha lang ang bag, wallet, o cellphone at hindi sila pinatay.
Itong isang vendor na nagsisikap sumistema kahit paano para makakain sa legal na pamamaraan, binugbog at ikinulong.
At ang rason may diperensiya raw sa pag-iisip at may nagsabi pang adik.
Gasgas man ang litanyang mahirap maging dukha sa bansang gaya ng Filipinas, pero sa totoo lang, ganoon at ganoon ang nangyayari sa panahon ng kagipitan.
Kaya naitatanong natin, hindi kaya kailangan na talaga ng “professional help” ng mga ganyang klase ng tao kasi nakapadali sa kanilang manakit ng kapwa?
Binigyan sila ng pagkakataong maging awtoridad, dahil inakala na kaya nilang magpatupad ng mga patakaran na may mataas na pagpapahalaga sa humanidad pero sa simpleng pagkakamali na walang face mask ‘e parang handang-handa silang makapatay ng kapwa tao?
Mayora Joy Belmonte, ‘overacting’ sa kabila pa ng ‘ka-overacting-an’ ang mga tao ninyo.
Para silang mga bastonerong, bago-bago pa lang nakahahawak ng baston at gigil na gigil ihampas sa kung sinong nakahambalang sa kanilang daraanan.
Ilang beses silang sinaway ng mga residente sa nasabing lugar pero parang nagtaingang-kawali lang sila.
Sana nama’y mapatawan ng karampatang parusa ang mga nanakit sa nasabing vendor.
Maraming salamat sa mga residente sa Panay Avenue, Barangay South Triangle na nagtulong-tulong upang mailabas sa detention cell ang vendor.
Sabi nga, there are good hearts after all.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
