HATAW! D'yaryo ng Bayan hatawtabloid.com
ANO kaya ang kaparusahang nababagay sa mga contractor na iniwan ang mga kinuhang construction workers sa mga probinsiya pero pinabayaang nakanganga noong ibaba na ang enhanced community quarantine?
Ilang kuwento ba ng construction workers ang nakita natin sa telebisyon na naglakad nang napakalayo para lamang makauwi sa kanilang mga pamilya?!
Pero kapag nakita ninyo ang kalagayan ng mga construction workers na ngayon ay makikita sa lansangan ‘e baka sabihin ninyong masuwerte ang mga naglakad noong unang bago pa lamang ang ECQ dahil ngayon ay kapiling nila ang kanilang pamilya.
Bagama’t may utos si Pangulong Rodrigo Duterte o ang IATF na ang mga manggagawang inabutan ng ECQ sa isang lugar ay dapat na tangkilikin ng nakasasakop na barangay, alam naman nating sa realidad ay hindi nangyayari ito dahil hindi nila kilala ang mga construction workers na dayo sa kanilang barangay.
Kaya ngayon, ang mga construction workers na inabandona ng kanilang contractor ay ‘nakanganga’ kung saan sila inabutan ng lockdown.
Kaya nga ang tanong nila, ano po ang parusang ipapataw ng pamahalaan sa mga contractor na nagpabaya sa kanilang mga trabahador?!
Hahayaan na lang ba ng mga awtoridad na palampasin ang pagpapabaya nila sa kanilang mga trabahador sa panahon ng pandemya?!
Ang mga opisyal ng local government unit (LGU) na hindi kinalinga ang mga manggagawa o trabahador na hindi nakaalis sa area of responsibility (AOR) sa panahon ng ECQ, wala ba silang nilabag na batas sa ilalim ng Bayanihan to Heal as One Act?!
Sino kayang makabayang abogado ang magseserbisyo nang pro bono para ipagtanggol ang mga trabahador na iniwan ng kanilang mga contractor sa panahon ng matinding krisis ng COVID-19?
Mantakin ninyong nalantad sila sa panganib na mahawa ng COVID-19 dahil nasa lansangan na sila at walang matuluyan at makainan?!
Sobra naman ang pagkaganid sa kuwarta ng mga contractor na ‘yan na basta na lang iniwan ang kanilang mga trabahador.
Hindi man lang ninyo naisip na hindi lang sila ang nagutom kundi ang kanilang pamilya na labis na nag-aalala sa kanila.
Sana nga, paglipas ng krisis na ito, panagutin sa batas ang mga pabaya at balasubas na contractors.
Singilin!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
